 |
नक्कली भिसा बनाई उदयपुरका चार जना युवालाई ठगी गरेको आरोपमा प्रहरीले एक गिरोहलाई पक्राउ गरेको छ । पक्राउ पर्नेमा झापाकी कल्पना कार्की नाम बताउने मिना खड्का र ओखलढुंगा सिस्नेरी गाविस–१ घर भई हाल काठमाडौं महानगरपालिका–१ कपनमा बस्दै आएका ४७ वर्षका इन्द्रबहादुर थापा रहेका छन् । सिन्धुली नेत्रकाली गाविस–६ का ३६ वर्षका चतुरलाल गोले भने फरार रहेको जिल्ला प्रहरी कार्यालय उदयपुरका एसपी नरबहादुर केसीले बताउनुभयो ।
एसपी केसीका अनुसार उनीहरुमाथि नक्कली भिसाको पेपर देखाई त्रियुगा नगरपालिका–१५ लेखबहादुर पाठक क्षेत्री, प्रेमबहादुर खड्का, शिव खड्का र त्रिनपा–६ का रेवत खड्कासँग २१ लाख ठगी गरेको आरोप छ । उनीहरुले घण्टाको १२ देखि १५ डलरसम्म कमाउने गरी क्यानाडा पठाइदिने आश्वसन दिई युवासँग रकम असुलेका थिए ।
मंसिर १६ गते घरबाट बिदाई भई काकडभिठ्ठा हुँदै सिलुगुडीको बागडोरा एयर पोर्टबाटबाट चढेका ति युवालाई कलकत्ता अन्तर्राष्ट्रिय एयरपोर्टमा छोडेर एजेन्ट फरार भएपछि युवाहरुले आफू ठगिएको महशुस गरेका थिए । युवाहरुले मंसिर १४ गते एजेन्टलाई रकम बुझाई क्यानाडाको यात्रा तय गरेको एसपी केसीले बताउनुभयो । क्यानडा जानका लागि लेखबहादुर पाठक क्षेत्रीले ७ लाख, पे्रमबहादुर खड्का र रेवत खड्काले ६/६ लाख र शिव खड्काले २ लाख गरी २१ लाख रकम चतुरलाल गोलेलाई बुझाएका थिए । प्रेमबहादुरले मंसिर १४ गते गाईघाट आइएमई कोड नं. ७४८७८९५३२१ ‘डी’बाट अतिथि इन्टरप्राइजेज प्रा.लि. इटहरी–१ को आइएमई शाखामा ६ लाख रुपैयाँ चतुरलाल गोलेलाई पठाएको रसिद सुरक्षित छ । त्योय रकम चतुरलालले तीन÷तीन लाख रुपैयाँको दरले झिकेको आईएमईको रेकर्डले देखाएको छ ।
अन्य तीन जनाले भने मोरङको पथरीमा रहेको शिवशक्ति होटलमा कल्पना भन्ने मिना खड्कालाई बुझाएको प्रेमबहादुरले बताउनुभयो । प्राप्त भएको रकममध्ये आरोपित चतुरलालले मंसिर १४ गते मेची नगरपालिका झापाको ठेगानामा आइएमई मार्फत इन्द्रबहादुर थापालाई दुई लाख रुपैयाँ पठाएको देखिन्छ । आरोपितमध्ये मिनाले नक्कली भिसा बनाई कलकत्तामा युएनको मानिस र अनुगमन विभागमा काम छ भन्दै होटलबाट भागेको प्रेमबहादुरले बताउनुभयो । उनीहरुले फोटो कपी पेपरमा बिना छापको इलेक्ट्रोनिक ट्राभल्स अथोराइजेसन नं. जे ५००११८८७० को भिसा, भिसा सकिने म्याद सन् २०२० नोभेम्बर २६ तारेख, र पासपोर्ट नं. ०९३१२७१९ उल्लेखित भिसा देखाएर रकम ठगेको एसपी केसीले बताउनुभयो । कलकत्ताको तीन दिन बसाइपछि उनीहरु गाउँ फर्किएका थिए । गाउँ फर्किएपछि उनीहरुले एजेन्डको खोजी कार्य जारी राखेका थिए ।
|
Post a Comment